Biar Gimana Ge, Sayur Pucung Betawi Kudu Tetep Ada

Sayur Pucung Betawi Kudu Tetep Ada


Sayur Pucung


Dulu kalo orang selametan bocahnya nyeng abis nikah kudu masak sayur pucung, ada istilah kalo si anuh nikah kita pada kebagian makan totok (Pala Gabus) nyeng pada disedekahin. 

Gabus Pucung dulu menjadi tradisi di kampung kita sebagai bebawaan atawa nyorognya keluarga dari pihak empuan ke keluarga lelakian. Jadi entuh dulu abis nikah nganten kaga langsung resepsi gelar hajatan, tapi ada tradisi nyeng namanya nyorog, nganten pada jalan kaki pada nganterin tentengan rantang nyeng isinya nasi ama sayur Pucung. 

Gabus Pucung nyeng dikasih kaga gratis, entuh pihak laki nyeng dikasih tentengan kudu bayar atawa istilahnya ngasih kepelan ke ngantin empuan sebagai tanda nyambung silaturahmi. 

Sayur Pucung di masyarakat Betawi dulu banyak macemnya, ada nyeng isinya Gabus, Ikan mas, Bandeng, lindung ampe terong ge kalo lagi kaga gableg duit  buat beli ikan Gabus, entuh terong dipucungin, tapi rasanya tetep sedep. 

Sayur Pucung Betawi Kudu Tetep Ada


Sayur Pucung mah makin lama disimpen bari diangetin di paso mangkinan nyerep rasa bumbunya, asal entuh ngambil sayurnya kalo kita mao makan jangan dicogroh ama tangan, kudu pake sendok, karena masakan nyeng kadung kena cogroh tangan jadi cepet basi. 

Entuh kita masing inget dulu, abis amil baca doa ama petasan kelar ngeberodog, entuh nyeng sedekahan udah pada berebut ama nyeng namanya totok Gabus, bocah mah pada ngiatan aja bapaknya pada cokoh pala Gabus. 

Lempengan ini mah bocah rada kurang doyan ama nyeng namanya sayur Gabus Pucung, makannya pada kaga bisa, takut tulangnya nyugrak di tenggorokan.
 
Entuh bocah mah, babanya pada uplek makan ama sayur Pucung, lah bocah pada asyik berebut petasan nyeng pada melempem, udahannya entuh muka pada jadi cemong kula obat petasan. 

Sayang tradisi bebawaan abis nikahan sekarang udah kaga dipake lagi ama masyarakat kita, emang Gabusnya rada mahal, orang sekarang mah pengennya nyeng instan bae dah, tapi biar gimana ge mestinya entuh sayur Pucung tetep ada, walau tibang syarat acara kawinan masyarakat Betawi apa apa ge, intinya Sayur Pucung Betawi tetep kudu lestari.

Bang Ilok
Ketua Yayasan Kebudayaan Orang Bekasi (KOASI)

----------------------

Baca juga tulisan khas Bang Ilok Lainnya:


comments

Lebih baru Lebih lama