Ngampakin Kayu
Dulu kalo temen kita ada nyeng mao kawin, kita sebulan sebelon ari kriyaaan kita udah pada kedangsakan bantuin temen kita nyiapin buat bikin acara kriyaan atawa hajatan.
Salah satunya entuh kita pada ngumpul ngampakin kayu di rumah entuh temen nyeng mao kawin.
Dulu pan kalo masak acara buat kriyaan kudu pake kayu, belon ada nyeng namanya gas, ada ge kompor tapi pan minyak tanahnya rada olok kalo buat masak nyeng banyak mah.
Nyambat ngampakin kayu buat kriyaan dulu mah emang udah jadi tradisi di masyarakat kita. Entuh nganten nyeng punya temen banyak jadi keberuntungan buat dia, nyeng bantuin jadi banyak dan entuh persiapan jadi rada cepet.
Nah kalo entuh bocah jarang gaul kaga ada temennya, nyeng bantuin ge rada segen kurang gepyak.
Kaga dibayar tibang dikasih rokok ama makan ala kadarnya entuh bocah pada resep bantuin ngampakin kayu.
Ngampakin kayu tambah resep kalo ada anak empuan nyeng pada bantuin masak. Apalagi ada nyeng kita idek, entuh kayu nangka nyeng rada uled dikampaknya jadi kaga berasa, saking semangatnya ngiat demenan.
Bagen dah tangan pada kapalan ge, nyeng penting bisa ngiat si anuh.
Tapi bae-bae kalo lagi ngampakin kayu, jangan ampe meleng, ngegecol dikit entuh kaki bisa bondas kena kampak.
Pada becanda, berasa kaga ada kata cape, kita resep bantuin temen nyeng mao kawin. Pan kalo nyeng mao kawin kata orang tua dulu mah udah kaya raja, kaga boleh ngapa-ngapain. Kaga boleh cape, nyeng penting entuh jaburan buat nyeng bantuin kaga kurang, alias cukup, biar nyeng pada bantuin kaga pada gerutu.
Dulu juga entuh nyeng namanya calon nganten kaga boleh deketin orang bebikinan kue buat bawaaan nganten, diomelin ama orang tua takut kuenya bantut alias kaga mateng, magel.
Jadi bener-bener entuh calon nganten kaga boleh ngapa-ngapain, biar kejaga awaknya tetep sehat ampe ari kriyaan digelar.
Cape ngampakin kayu entuh kita dikasi makan ama tuan rumah. Hidangannya ge tibang sayur asem, ikan asin, lalab ama sambel terasi nyeng rada medok.
Bujrek, tibang begitu saking laparnya sayur asem di mangkok kita kaga uyup pake tesi lagih, langsung kita uyup di mangkoknya... serudut.... entuh daon ninjo ampe nempel di bibir, saking sedepnya ampe keenjut.
Abis begawe, cape, dikasih makan ama gituan jadi sedep bin sumbrah. Entuh kuah sayur ampe kaga besisah, saking nikmatnya. Kalo belon nambah belon udah.
Penulis: Bang ILok.
Ketua Yayasan Kebudayaan Orang Bekasi (KOASI)