Betawi Punya Cerita
Sunatan
Kondangan tempat orang nyunatin ..eh jadi pengen disunat lagi, eh salah jadi inget waktu dulu kita mo disunat.
Cerita sunatan zaman ganu, ntuh dulu nyeng namanya orang sunat pan biasanya nunggu abis orang kriyaan atawa ari ngabisan, ntuh bocah pagi umun-umun udah dibangunin, dimandiin dan didandanin biar cakep.
Dimandiin pagi-pagi biar ntuh bocah nyeng mao disunat jadi seger, bersih dan anunya mengkered, biar gampang nariknya pas mao dipotong.
Nyunatin abis kriyaan kawinan biasanya biar kaga ngundang lagi, kalo pas abis kriyaan dulu ntuh sodara-sodara dan keluarga jauh masing pada ada, ngendon belon pada pulang.
Dulu ada cerita bocah abis ari ngabisan mao disunat, semua sajen atawa persyaratan udah lengkap, umun-umun udah mandi ..eh pas liat bengkong nongol, ntuh bocah diem-diem kabur.
Dicariin ama babanya kaga ketemu ....padahal ntuh sayur emas Pucung, sayur kembili plus sambelan bocak-bacek udah dibikin buat selametan. Eh bocahnya kaga ketemu dicariin, ampe baba bengkong pegel nungguin ntuh bocah, kaga nongol pisan.
Sunat / khitan zaman sekarang emang rada praktis dan bisa langsung pake celana, tapi kaga ada seni ama budayanya kaya zaman dulu. Ntuh bocah pake sarung ditangsel pake sambuk biar kaga nempel kaen ama anuan.
Dibikinin keprek dari bambu bulu nyeng gunanya buat ngusir reriwa ama laler, biar kaga nemplok di bagian nyang disunat.
Bocah nyang lagi sunat kaga boleh ngelangkain akar, apalagi akar pu'un nangka
Ada nyeng bilang kalo dilangkain, ntuh anunya bakalan kaya akar, apalagi akar nangka nyeng rada belang, basa baba kita nakutin bocahnya biar kaga semelepangan.
Lagian kalo bocah nyeng lagi sunat belon bae ngelencakin akar, bisa tambah melangkem anunya, kepentog-pentong pas ngelencak.
Bukannya kalo disunat dibengkong lama bae, dasar bocahnya nyeng terakalan. Aturan udah kering, karena lantaran ntuh bocah terakalan naek pu'un paya ngakalin layangan putus, ntuh anunya jadi bengkak lagi.
Padahal ditiup ama baba bengkong go entuh anuan udah sirep dan kering.
Penulis: Bang Ilok
Ketua Yayasan kebudayaan Orang Bekasi ( KOASI)